Mr Honey久唔久就會話好掛住佢家鄉嘅Yorkshire Pudding，但係佢近幾年都無google邊度有得食（男人！）， 我聽到好鬼煩，咁我就揾下邊度有，一揾就揾到Island Shangri-la嘅Lobster Bar and Grill每星期日做緊Sunday Roast。 我俾完個menu Mr Honey睇，佢即刻雙眼放光話可唔可以book最快嘅星期日！ Well，能幹係咁練出嚟！就係咁我哋嗱嗱聲去食咗轉😆大家有興趣記得save個post，咁就唔會揾唔返啦♥️
🍽前菜(有4款揀)👇🏻
⭐️大蝦牛油果蓉生菜沙律👉🏻好食！蝦好大隻又好新鮮，好彈牙！ 見到咁足料都開心～
⭐️蟹肉牛油果醬配牛油軟包(要另加HK$200)👉🏻我見呢個幾特別要另加錢所以叫嚟睇下好唔好食！ 正喎，賣相精緻之餘，蟹肉牛油果都好足，最正係佢個toast，外層勁薄勁脆，但係入面又軟緬緬。 整體好好食又有驚喜！無加錯錢！ 哈哈～
💁🏻♀️另外有烤蘆筍或者法式龍蝦湯可以揀。
🍽主菜(有6款揀)👇🏻
⭐️烤豬扒配英式血腸，烤焗馬鈴薯，甘筍，忌廉椰菜，約克郡布甸，芝士焗椰菜花，蘋果醬及豬肉燒汁👉🏻戲肉啦！同Mr Honey掛住嘅完全一樣！ 佢見到個Yorkshire Pudding (約克郡布甸) 個下笑到見牙唔見眼，話咁大個又黑黑哋，呢個就係佢心目中嘅正宗( 佢係英國人，佢話正宗就正宗啦🤣)。我見佢食得好知滋味 ！ 一路食一路讚！ 佢又話似返咗鄉下，咁應該係好好食！ 食Yorkshire Pudding嗰陣，Mr Honey就叫店員另外俾gravy，因為唔夠汁有啲乾。 睇你鍾意乾食定濕食，我自己都鍾意有汁多啲。 豬扒有好多肥膏部份（差不多一半），如果唔想食咁多肥膏，可以揀另外嘅扒類，因為配菜都差唔多。
⭐️烤肉眼扒配烤焗馬鈴薯，甘筍，忌廉椰菜，約克郡布甸，芝士焗椰菜花，辣根及牛肉燒汁👉🏻我揀左牛，配菜大至上同豬嘅差唔多。 個牛好好食，煮得啱啱好，份量都好多！ 我食緊個吓都覺得自己去咗英國呀！
💁🏻♀️如果配料同我哋呢兩份差唔多嘅話，仲有烤羊腿或者如果食素嘅話可以揀烤芹菜。另外仲有配料完全唔同嘅嘢可以揀，不過就要加錢👉🏻 加HK$200可以揀原隻龍蝦或者加HK$800可以兩位一齊享用烤帶骨肉眼扒配烤牛骨髓😉
🍰甜品(有3款揀)👇🏻
⭐️拖肥椰棗蛋糕配雲呢拿雪糕👉🏻Mr Honey話呢個做得好好，好正宗！ 佢又係食得好開心。 我就麻麻哋，我食咗一嗒放底咗！ 好鬼甜呀！ 係死甜！ 我都有問Mr Honey係咪應該係咁甜㗎呢，佢好瀟灑拋底一句: 係！ 咁如果你掛住Sticky Toffee就更係叫呢個，但係如果你好似我咁唔係好死甜得嘅就唔好喇。
⭐️焗焦糖蘋果批配雲呢拿雪糕👉🏻呢個有蘋果，所以酸酸哋！ 雖然有焦糖同雪糕都係甜，但係因為蘋果比較酸，所以平衡翻！ 我覺得唔錯，但係我唔覺得好好食或者好驚喜，我係無得揀所以揀呢個！
💁🏻♀️如果唔特別想食甜野，可以揀芝士。
💲個Sunday Roast午餐包三道菜(前菜，主菜，甜品)，每位HK$598。如果連埋任飲紅白餐酒及血腥瑪莉雞尾酒就每位HK$788。有加10％服務費。佢另外仲有啲連香檳嘅package。有興趣自己去到望下。
💁🏻♀️坐位好舒服啱晒星期日去chill！！服務細心有禮貌，照顧周到！一般大酒店嘅服務水準！食物嚟講好好食，份量好多好夠，就算大食都一定食得飽㗎！ 呢個份量同用料，我覺得非常對得住個價錢。Mr Honey已經講咗想1-2個月去一次！我唔知佢哋Sunday Roast會做幾耐啦，不過如果一直做嘅話，Mr Honey都會返去。 咁就睇到佢有幾滿意同埋幾正宗啦！我覺得就算你唔特別想食Sunday Roast都可以試下。 同朋友一路食下傾下，都好開心！ 佢哋做兩轉: 第一轉係11.45am，第二轉好似係2:00pm。所以兩個鐘要交枱，不過絕對夠時間食，唔會好趕！可以save低呢個post當參考 😌
🤔綜合評分(10分滿分啦)：
環境: 8/10
食物: 8/10
服務: 8/10
抵食: 8/10
整體: 8/10
🍴餐廳：龍蝦吧餐廳 Lobster Bar and Grill
📍地址：金鐘金鐘道88號太古廣場二座港島香格里拉酒店6樓
☎️電話：28208560
📲有無得Open Rice book位：冇 (link)
