好多個月前喺誠品見到呢本書，見個書名”下個10000小時，你打算怎樣過?” 幾吸引就買咗，我最初唔知道係邊個寫，亦都冇深入研究。 買完返到屋企放咗喺書櫃待讀。 前幾日做完野枱頭見到呢本書呼喚緊我，我覺得應該係時候去睇下，先知道作者係北京人，亦係人生規劃師，有唔同公司既工作經驗亦有請人經驗。
下個10000小時，你打算怎樣過？by 周結林
呢本唔係一本故事書，你可以當佢係一本講人生道理嘅書。 佢以文章形式去講分析而家一般人嘅心態從而再用一啲短小嘅故事去分享正向嘅心態。 我越睇就越覺得作者同我見解好相似，越睇越有共鳴，所以我兩三日就睇完。
書本當中有好多打氣嘅說話，亦有描述好多人喺迷惘時候嘅情感。 有啲位我都睇到眼濕濕，因為我完全經歷過嗰種難捱。 一路睇一路諗，如果係我後生嘅時候讀到呢本書，我應該係會更加努力，同埋對人生應該有更好嘅心理準備。 但係而家讀到都唔遲，因為一路讀嘅時候嗰啲打氣嘅說話就好似一個老朋友同你傾緊偈，一路比緊能量你。
有時我都會諗努力係咪一定會有回報？ 自律嘅人生係咪對自己太過苛刻？ 當然呢啲念頭我都唔會俾佢喺我腦海之中飄浮太耐，但係有時見到其他人都一樣相信努力係會有回報，自律嘅人生係為咗未來嘅自己更加好，就不期然會覺得好安慰好窩心。
呢本書我覺得同其他書一樣，唔會啱晒所有人去睇。 我覺得如果你啱啱出嚟社會做事想有正確嘅心態，或者你而家處於迷惘期想要一啲正能量，又或者你而家處於沮喪期想改變你嘅人生，甚至乎你而家處於艱難期你開始對人生失去信心，我覺得呢本書好值得你去讀。 但係我先要提一點：你一定要心態正確去讀呢一本書，如果你處於憤世嫉俗充滿負面情緒，覺得世界虧欠左你，世界好唔公平既話，咁你暫時首要嘅功課係要去整頓你嘅情緒，調整好自己心態先再去睇呢本書。 因為冇良好嘅心態，你唔會吸收到書中真正嘅智慧，反而你會覺得作者廢噏浪費你時間。
如果你會睇呢本書，你記得喺IG同我分享，你睇完個感覺係點樣。 祝大家每一日嘅內心同埋能量都比尋日強大。
