因為前幾日要去西九龍文化區睇Chanel展覽，所以就喺附近搵嘢食。 上網見到呢間囍公館食中菜好似唔錯，就去試吓。 初初我以為佢晚市都有點心食，原來係冇㗎🤣咁我哋又唔想諗，所以就試吓佢哋嘅公館套餐FAM Set🫶🏻大家有興趣記得save底個post，咁就唔會揾唔返啦♥️
公館套餐FAM Set $580/位 (最少要兩位)
⭐️前菜: 香草蜜豆玫瑰露叉燒👉🏻叉燒望落好令身，食落都好食。雖然係厚切，但係唔會鞋到似咬緊拖鞋
⭐️前菜: 煙燻四喜喜素鵝👉🏻呢個唔錯，有少少煙燻味道，但係又唔會太濃烈
⭐️湯: 花膠北菇燉菜膽👉🏻好清甜既一個湯，nice
⭐️主菜: 惹味欖菜龍蝦👉🏻呢個幾有驚喜，見到隻龍蝦都幾大隻👍🏻面頭見到啲脆卜卜嘅欖菜，感覺幾特別，但係食落我就淨係食到龍蝦嘅味道，我食唔到欖菜嘅味道，反而我覺得龍蝦夠鮮味夠彈牙，唔計食唔到欖菜嘅味道，其實隻龍蝦係好食
⭐️主菜: 囍迎鴿👉🏻我唔知幾耐冇食乳鴿，外皮趣卜卜又熱辣辣，唔錯唔錯
⭐️主菜: 鮮腐竹豆湯浸時蔬👉🏻見到啲湯真係奶白色，都覺得佢足料。 味道唔錯，冇咩特別
⭐️主菜: 大廚炒飯👉🏻炒飯入面都有好多料，唔hea喎，炒得乾身唔會油淋淋，啲飯亦都一粒粒唔會黐埋一齊，呢個我哋兩個都有驚喜
⭐️甜品: 薑茶湯圓👉🏻救命，呢個好食到爆👍🏻湯有好濃嘅薑味再配埋濃味芝麻湯圓，我同Mr Honey一路食一路話好有驚喜。
🍹飲品👇🏻
我哋兩個都係飲水，所以冇特別。
💁🏻♀️餐廳嚟講地方都好大，可以坐出面又可以坐入面。 一路食其實就係一路望住維港嘅景色，好chill。 而且因為地方闊落唔會坐到人迫人，好啱一家大細一齊食飯，或者三五知己一路食一路吹水。食物方面都新鮮，份量都好飽。 雖然一望到個價錢唔肯定佢高唔高性價比，但係我覺得佢嘅用料同埋味道都對得住個價錢。 如果唔想自己花心思散叫，呢個套餐都係一個好嘅選擇，又或者兩個人散叫會太多嘢食食唔晒，咁呢個餐都係一個好嘅選擇。 服務方面，我覺得啲叔叔都有留意客人有冇需要，亦都好快手執碟，感覺有少少似去咗酒樓，但係我覺得OK，起碼唔會唔理人先。我覺得你又唔需要特登搭車入去試，但係如果你去開果頭想搵個地方舒舒服服食嘢，呢間都會係一個好嘅選擇👉🏻可以save低呢個post當參考😌
🤔綜合評分(10分滿分啦)：
環境: 9/10
食物: 9/10
服務: 8/10
抵食: 8/10
整體: 8.5/10
🍴餐廳：囍公館
📍地址：尖沙咀西九文化區藝術公園地下GF-01-03號舖
☎️電話：28663667
📲有無得Open Rice book位：有 (link)
